Sot është tentuar që banorët e dy shtëpive ngjitur me njëra-tjetrën në zonën pranë shkollës “Petro Nini Luarasi” në Tiranë të nxirren jashtë dhe objektet të shemben, pasi trualli është fituar me gjyq nga një palë tjetër. Por banorët kanë prostesuar, duke u shtrirë në rrugë e madje një prej anëtarëve të kësaj familjeje ka humbur ndjenjat.
Ata pretendojnë se shtëpia e tyre është me dokumente të rregullta dhe po përpiqen t’ua marrin në mënyrë të paligjshme. Kryefamiljari deklaron se punonjësit e Bashkisë janë shfaqur sot për të shembur shtëpinë e tyre pavarësisht se procesi gjyqësor nuk është mbyllur ende, duke shtuar se e kanë blerë këtë shtëpi nga Enti i Banesave në vitin 1993. Ata thonë se kanë dokumentacion të rregullt, legalizim dhe hipotekë për shtëpinë e ndërtuar. Banorët kanë djegur edhe disa goma përreth shtëpisë, ndërsa është dashur ndërhyrja e shërbimit zjarrfikës për shuarjen e flakëve.
“Është investimi i një jete, ku të shkojmë ne?”, kanë thënë banorët. Policia ka shkuar në vendngjarje dhe ka shoqëruar tre banorë, po ashtu edhe autoambulanca për të marrë personin që humbi ndjenjat. Situata ka qenë e tensionuar, ndërsa shumë forca policie janë mbledhur në zonën përreth./Opinion.al
