Rreth 1 mijë gazetarë nga e gjitha Europa mbërritën në Tiranë në 16 Maj, nga ku raportuan për një nga ngjarjet më të rëndësishme diplomatike që është zhvilluar në Shqipëri, Komunitetin Politik Europian.
Reporterë dhe operatorë nga 47 vende të Europës raportuan në kohë reale zhvillimet e samitit, secili me fokus në temat që prekin vendet nga vinin. Disa prej tyre ndanë me Klan News përvojën e raportimit nga Shqipëria.
Nga Turqia, interesimi ishte i përqendruar te qëndrimet e liderëve evropianë ndaj zhvillimeve në Lindjen e Mesme, përfshirë konfliktin në Gaza dhe përpjekjet për paqe.
“Këtu po mblidhen drejtuesit më të rëndësishëm të Evropës, ndërkohë që ne po ndjekim me vëmendje të gjitha zhvillimet. Situata në Gaza mbetet dramatike dhe po kërkohet një rrugëdalje që të çojë drejt një procesi paqeje. Një tjetër çështje shumë e rëndësishme për ne është marrëdhënia mes Shqipërisë dhe Turqisë, e cila ka qenë gjithmonë e veçantë dhe strategjike”, tha Kadija Omary, nga TRT Arabia
Ndërsa gazetarët spanjollë fokusin kryesor e kishin te siguria, një çështje që mbetet prioritare për vendin e tyre në arenën ndërkombëtare.
Edhe pse Tirana i priti me reshje shiu, për shumë prej tyre kjo ishte një përvojë e veçantë.
“Kjo është përvoja ime e parë në Tiranë. Për të qenë i sinqertë, jam i befasuar. Kryeqyteti i Shqipërisë është shumë i bukur. Njerëzit janë tepër miqësorë dhe bashkëpunues.”
“Ishte një përvojë vërtetë mbresëlënëse në aspektin profesional. Së pari, vetë vendet që morën pjesë dhe vendi ku u zhvillua, ishin vërtet të jashtëzakonshëm, të denjë për një ngjarje të këtij niveli.”
“Është një përvojë shumë e mirë të jesh këtu, në këtë shesh plot histori, për të mësuar më shumë rreth politikës dhe historisë së Shqipërisë. Mendoj se është një mënyrë shumë e mirë për të njohur më nga afër kolegët tanë të ardhshëm në Bashkimin Europian.”
Organizimi i këtij samiti në Tiranë, jo vetëm e shndërroi qytetin në zemrën e politikës evropiane, por edhe në një hapësirë bashkëbisedimi për mediat ndërkombëtare, që duket se nuk do të jetë thjeshtë një pikë ndalimi në axhendën e tyre.
Klan News
