TIRANË- Nuk është më lajm se kryeqyteti ynë është edhe kryeqendra e zhurmës. Lajm është se niveli i lartë i ndotjes akustike është disa herë më i lartë se norma e OBSH-së dhe asgjë nuk ndryshon, përkundrazi ka vetëm përkeqësim.
Drejtori i Përgjithshëm i Agjencisë Kombëtare të Mjedisit, Julian Beqiri pranoi se jo vetëm Tiranë por i gjithë vendi vijon të ketë një nivel të lartë të ndotjes akustike.
Duke i marr qytetet kryesore me radhë shohim se nga 55 decibel që është vlera e lejuar gjatë ditës, në kryeqytet ajo kap vlerën e 67dB.
Beqiri sqaron se në muajin tetor është kryer një monitorim në 31 pika, në 5 qytete të ndryshme, ku Korça rezulton të jetë qyteti më pak i ndotur, ndërsa Tirana dhe Vlora me nivelin më të lartë të zhurmave.
Sa i përket kryeqytetit, Rruga e Elbasanit rezulton të jetë zona më e ndotur gjatë ditës, ndërsa gjatë natës zona tek “Farmacia 10”. Shkaktar kryesor i nivelit të lartë të zhurmave mbetet trafiku i rënduar.
