Tirana fiton në Gjeorgji ndaj Dinamos së Batumit 1-2 dhe kalon në fazën e ardhshme të Conference League, pasi ndeshja e parë në Shqipëri ishte mbyllur në barazim 1-1.
Edhe pse në ndeshjen e parë në Arenën Kombëtare skuadra bardheblu vuajti të dilte në lojën e saj, në takimin e kthimit në Gjeorgji, Tirana luajti më e bashkuar edhe pse mendoi më shumë për fazën mbrojtëse.
Në minutën e 28 Redi Lushkja shënoi për Tiranën pas një asisti nga Abazaj. Vendasit e Batumit e rritën presionin në portën bardheblu, por pa mundur të çanin murin shqiptar. Ndërkohë, në minutën e 78 ishte Ardit Deliu i cili realizoi një gol mjaft të bukur.
Në minutën e fundit të kohës së rregullt, Kapanadze shkurtoi diferencën për Batumin, por edhe pse arbitri akordoi 8 minuta shtesë, rezultati nuk ndryshoi më dhe tashmë është Tirana që siguron biletën për në fazën e ardhshme të Conference League.
