Tirana renditet ndër vendet me kostot më të lira të jetesës në Europë. Nga 181 qytete të Europës që janë listuar nga Numbeo, portali më i madh që grumbullon të dhëna mbi kostot dhe cilësinë e jetesës, Tirana renditet në vendin e 155.
Megjithatë kryeqyteti i Shqipërisë nuk është më i liri në rajon. Prishtina “ka rrëmbyer” vendin e parë si qyteti më i lirë i Europës. Ndërkohë që ndër vendet e rajonit pas Prishtinës renditet Shkupi, në vendin e 168, ndërsa Tirana është e treta, shkruan revista “Monitor”.
Për të përcaktuar indeksin e kostove të jetesës, Numbeo bazohet në 5 indekse të tjera siç janë: indeksi i qirave, indeksi i kostove të jetesës plus qirasë, indeksi i shportës bazë, indeksi i restoranteve, indeksi i fuqisë blerëse të vendasve.
Për sa i përket indeksit të qirave, Tirana është më e shtrenjtë edhe se Sarajeva, e cila në renditjen e përgjithshme është më e kushtueshme se kryeqyteti i Shqipërisë.
Por, Tirana renditet me indeksin më të ulët në rajon për sa i përket fuqive blerëse të vendasve. Ndonëse Tirana është e lirë për të huajt që vijnë të jetojnë në Shqipëri, ajo është shumë e shtrenjtë për vendasit. Indeksi i fuqisë blerëse të vendasve është 33.8 në Tiranë, rreth 38.01 në Beograd, 40 në Shkup, 48 në Podgoricë dhe 65.9 në Prishtinë, shkruan “Monitor”.
Indeksi i fuqisë blerëse 33 në Tiranë do të thotë se vendasit këtu mund të blejnë rreth 70% më pak se njujorkezët me pagë mesatare. Në këtë renditje të Numbeos për kostot e jetesës është marrë si referencë kostot e jetesës në Nju Jork (100) dhe treguesit krahasohen me këtë qytet./Opinion.al
