Gjiganti teknologjik, Microsoft deklaroi se oferta e tij për blerjen e aplikacionit kinez, TikTok, është refuzuar.
Kompania që zotëron aplikacionin TikTok, Bytedance, është cituar t’i ketë thënë Microsoftit se nuk do t’ia shesë kësaj kompanie operacionet e aplikacionit në Shtetet e Bashkuara. Në disa raportime të mediave prestigjioze ndërkombëtare, është thënë se Bytedance ka përzgjedhur kompaninë Oracle në vend të Microsoftit. Mirëpo as TikTok dhe as Oracle nuk i kanë komentuar këto pretendime.
Muajin e kaluar, presidenti amerikan, Donald Trump ka kërcënuar me ndalimin e TikTok-ut në mesin e muajit shtator, duke supozuar se kjo platformë përbën rrezik për sigurinë kombëtare të Shteteve të Bashkuara.
Sipas Trump, të dhënat që ky aplikacion zotëron mund të shfrytëzohen nga kompani kineze të inteligjencës, ndaj ka kërkuar që ByteDance të negociojë për shitje me bizneset amerikane. Nga ana e saj, TikTok mohon se ka ndarë me qeverinë kineze të dhënat e përdoruesve dhe ka paditur administratën amerikane.
Aplikacioni i videove ka rreth 100 milionë përdorues amerikanë dhe 700 milionë në gjithë globin. Ai ofron mundësi të realizimit të videove të shkurtra argëtuese të njerëzve duke kërcyer, imituar apo duke sfiduar njëri-tjetrin në gara të ndryshme./Opinion.al
