Spektakli në fushën e lojës në derbin e Italisë, Inter-Napoli u sfumua në përfundim të 90 minutëshit, pasi mediat nxituan të publikonin detaje dhe foto nga një sherr masiv mes huliganëve përpara ndeshjes.
Pas këtij sherri një tifoz i Interit ndërroi jetë pasi u përplas nga një minibus i tifozëve napolitanë.
Mediat italiane raportojnë se viktima është 35-vjeçari Daniele Belardineli.
Ai ishte pjesë e tifogrupit ekstremist të Vareses dhe ishte përjashtuar nga stadiumet italiane për 5 vjet si pasojë e trazirave të ndryshme.
Viktima gjithashtu mësohet të jetë mik i ultrasit fashist të Interit, shqiptarit nga Lezha, Landi Gjoni. Landi dhe Daniele kanë qenë pjesë e grupimit “Blood & Honour”.
Tifozët e Vareses kanë binjakëzim me ata të Interit dhe shpesh herë kanë qenë të pranishëm në “San Siro”, ndaj edhe 35-vjeçari mori pjesë në sherrin që i mori dhe jetën.
