Kryeministri Edi Rama në cilësinë e dëshmitarit në Komisionin Hetimor për Inceneratorët ka mohuar se janë dhënë para për inceneratorët pa vendim të Këshillit bashkiak.
I pyetur nga Belind Këlliçi se pagesat janë kryer pa vendim të Këshillit Bashkiak, Rama thekson se nuk ka shans që të lëvrohen para nga thesari pa vendim të Këshillit Bashkiak.
“Nuk ka shans që të lëvrohen para nga thesari pa vendim të Këshillit Bashkiak. Nuk ta lejon thesari do të thotë është nul se ka mekanizëm. Shteti funksionon. Se nuk është shtet si në kohën tuaj. Ridvan Bode ministri thoshte nuk bëhej ju i thoshit po dhe Ridvani i shkretë linte gjurmën aty, sesi dihet drejtësia e re është vetëm në fillim. Ku funksionon pa vendim të Këshillit Bashkiak të çelen fonde?”
Këlliçi tha se Veliaj nuk ka dërguar në Komision asnjë vendim të Këshillit Bashkiak, ndërsa Rama u përgjigj me ironi duke thënë se do t’i thyejë notën në sjellje kryebashkiakut.
“Nuk marr të mirëqenë asgjë nga këto që thoni ju. T’i thyejmë notën në sjellje, për sjellje të parregullt me komisionin po jo më thua mua që ka nxjerrë para”, tha Rama.
