Edhe pse duket se deputetët demokratë po përpiqen për bashkim, përsëri palët janë larg një bashkëpunimi të plotë për zgjedhjet lokale.
Më herët, Sekretari i Përgjithshëm, Flamur Noka tha se ka biseduar me deputetin Enkelejd Alibaj, por ky i fundit ka refuzuar bashkëpunimin.
Ndërkohë, thirrja e radhës për bashkim vjen nga deputeti demokrat Dashnor Sula. Nëpërmjet një postimi në rrjetst sociale, Sula shkruan se PD duhetët ketë kandidat të përbashkët dhe se nuk duhet të përsërisë gabimin e 6 marsit duke shkuar në zgjedhje me dy kandidatë.
Sula thotë se tashmë Gazment Bardhi është personi që duhet të nis negociatat, ndërsa nga ana tjetër negociator është Edi Paloka.
Postimi i deputetit
Opozita me kandidat të përbashkët!
Të gjithë deputetët e grupit parlamentar të PD janë në parlament me votat e demokratëve. Ndaj në zgjedhjet lokale do të ishte gabim i rëndë të përsërisnim papjekurinë e 6 Marsit.
Bashkimi i PD në një qëllim të vetëm: ti japim demokratëve një kandidat të përbashkët më të mirë se ata të mazhorancës duhet të jetë obligimi i të gjithëve neve. Ditët e fundit ka patur sinjale pozitive brenda nesh që në këto zgjedhje që janë më afër qytetarëve të lemë mënjanë mosdakordësitë brenda vetës dhe tu paraqitemi demokratëve dhe shqiptarëve me një kandidat të vetëm.
Në këtë aspekt të gjithë duhet të bëjmë përpjekjet maksimale që ta çojmë përpara këtë frymë pa vendosur kushte. Në këtë frymë u caktua sot edhe z. Bardhi për të diskutuar me pjesën tjetër të kolegëve tanë. Nga ne nuk ka kushte në përpjekjen për të gjetur rrugën e duhur për të dalë përballë kundërshtarit tonë politik Edi Rama me nje kandidat të përbashkët.
Kjo do duhet të ndodhë edhe me pjesën tjetër të grupit tonë. Vendosja e kushteve apo e parakushteve ndihmon vetëm partinë në pushtet. Jo vetëm demokratët por të gjithë shqiptarët nuk e meritojnë keq qeverisjen nga kjo mazhorancë. Ndaj edhe neve duhet të na shqetësojë kjo gjë e të gjithë së bashku të bëhemi alternativë.
Si një familje e cila pavarësisht mërive të momentit në kohëra të vështira bëhen bashkë, ashtu edhe ne si një familje e madhe në kushtet kur të gjithë pushtetet janë përqendruar në një dorë dhe shqiptarët po detyrohen të largohen çdo ditë, duhet të lemë mënjanë interesat e ngushta e duhet të bashkohemi për ti kthyer pushtetin lokal qytetarëve duke u bashkuar.
