Zbulohen të tjera fakte që e implikojnë drejtpërdrejt Autoritetin Rrugor Shqiptar në skandalin e moszbatimit të vendimit të formës së prerë të Gjykatës, për vendosjen e parmakëve mbrojtës në vendin ku, më 7 Maj, si pasojë e një aksidenti rrugor gjetën vdekjen dy fëmijë dhe u plagos nëna e tyre me një tjetër fëmijë të saj.
Pronari i karburantit, që ishte në konflikt gjyqësor me Autoritetin Rrugor Shqiptar, zbuloi në emisionin “Opinion” se vendosja e parmakëve në aksin rrugor Golem – Rrogozhinë ka nisur në muajin Gusht të vitit 2014, një muaj pasi Gjykata Administrative e Apelit kishte marrë vendim për vendosjen e tyre me detyrim edhe në vendin, ku ndodhi aksidenti, që ishte lënë pa parmakë metalikë në funksion të karburantit.
Sipas dëshmisë së Pilo Kërit, parmakët metalikë janë vendosur në të gjithë gjatësinë e rrugës, përveçse në vendin për të cilin Gjykata kishte dhënë vendim të formës së prerë, sipas kërkesës së vetë Autoritetit Rrugor Shqiptar.
Ky skandal e thellon edhe më tepër përgjegjësinë e Autoritetit Rrugor Shqiptar, i cili është pronar i kësaj rruge. Skandali merr përmasa më të mëdha jo vetëm se Autoriteti Rrugor Shqiptar ka mbajtur të fshehur një vendim gjykate, të formës së prerë, por edhe për faktin se ka përjashtuar në mënyrë selektive nga procesi i vënies së këtyre elementëve të sigurisë, vetëm vendin për të cilin kishte fituar një betejë ligjore në gjykatë.
Pikërisht anashkalimi i këtij vendimi të Gjykatës, sipas Prokurorisë së Kavajës, ka bërë që aksidenti i 7 Majit të përfundonte me dy të vdekur.
Pasojat e aksidentit rrugor do të ishin më të vogla, nëse siguria rrugore e aksit ku ka ndodhur ngjarja do të ishte më e lartë dhe lëvizja e automjetit të aksidentuar do të ishte në rrethana të tjera, nëse hapësira e ndërprerë e guardrelave do të ekzistonte e përfunduar, pra e plotësuar, duke bërë që forca goditëse e automjetit të amortizohej, thuhet në njoftimin zyrtar të Prokurorisë.
Hetimet e deritanishme kanë çuar në burg 3 drejtues të Autoritetit Rrugor Shqiptar, por ato vazhdojnë, pasi dyshohet në implikimin e titullarit të këtij Autoriteti.
Tv Klan
