Shqipëria lë përsëri gjurmë në mediat prestigjoze për bukuritë natyrore dhe opsionet për të pushuar. Revista amerikane ‘The Travel’ e cilëson Rivierën Shqiptare si një thesar të fshehur, krahasuar me fqinjët e saj më të frekuentuar mesdhetar.
Në reportazh theksohet se mes këtyre mrekullive natyrore të këtij bregdeti ndodhet fshati simpatik i Ksamilit, i zbukuruar me disa nga plazhet më piktoreske që mund të gjenden kudo përgjatë Mesdheut.
Ujërat e kaltra puthin butësisht vijën bregdetare, duke krijuar një parajsë për adhuruesit e plazhit dhe diellit.
Keni ëndërruar ndonjëherë për një arratisje mesdhetare që është e përballueshme për xhepat tuaj dhe mbush shpirtin me bukurinë e peizazheve të pacënuara?
Ksamili, një perlë e fshehur në Rivierën Shqiptare ju premton pushime të paharrueshme dhe të përballueshme pa kompromentuar thelbin befasues të Mesdheut vijon ndër të tjera revista e njohur amerikane.
Interesante mbetet fakti që Ksamili ja del të përfshihet në listën e 10 destinacioneve me plazhet më piktoreske në Mesdhe, pjesa më e madhe e tyre e njohur botërisht prej kohësh.
Por shumica e këtyre detinacioneve të njohura, nisur nga ishulli grek i Mikonosit e deri tek brigjet italiane të Amalfit janë të mbipopulluara dhe shpesh me çmime të kripura./ Klan News
