Shqipëria po shndërrohet shumë shpejt në një nga destinacionet më emocionuese të pushimeve në Evropë. Kështu shkruan gazeta e përditshme britanike “The Times” në një artikull, ku rendit bukuritë që mund të vizitohen nga bregdeti, Tirana e deri në veri.
“Vendi ballkanik ka plazhe spektakolare, mikpritje të ngrohtë, një kryeqytet emocionues dhe shumë atraksione të tjera për të eksploruar”, shkruan gazetarja Alice Taylor në këtë artikull.
Plazhet e saj janë ende atraksioni kryesor, me çmime të përballueshme krahasuar me destinacionet më të njohura evropiane për pushime. Sipas gazetares, Shqipëria ofron ende shumë mundësi për përvoja të paarritshme.
Sipas “The Times”, Shqipëria paraqet një alternativë fantastike për adhuruesit e natyrës që kërkojnë të largohen nga plazhet e mbushura me njerëz. Rrugët e reja – si ato që lidhin fshatin bregdetar të Qeparos me Nivicën, në male – e bëjnë më të lehtë aksesin në vendet e shkëputura.
Mikpritja ndaj të huajve, sipas “The Times” është një tjetër pikë kryesore, veçanërisht në bujtina. Ndërsa kryeqyteti, Tirana vlerësohet si një opsion i shkëlqyer për pushime në qytet gjatë gjithë vitit. ajo që ka tërhequr vëmendjen e gazetës së njohur britanike janë muralet nëpër pallatet e vjetra të kohës së komunizmit.
Majde, “The Times” kujton se kur Kryeministri Edi Rama u bë kryetar i Bashkisë së Tiranës në vitin 2000, kryeqyteti i Shqipërisë përjetoi një transformim të rëndësishëm përmes një fushate pikturash që i dha jetë të re ndërtesave të epokës komuniste të qytetit me artin shumëngjyrësh të rrugës.
Në këtë artikull, turistëve u rekomandohet të vizitojnë qyetetet e trashëgimisë botërore të Beratit dhe Gjirokastrës, të paharrueshme për arkitekturën, kalatë dhe pazaret e tyre osmane.
Për të zbuluar një pjesë të historisë edhe të Ballkanit, rekomandohen Butrinti apo Apolonia.
Ndërsa riviera shqiptare që shtrihet nga Vlora në Sarandë vlerësohet për plazhet e mahnitshme. Në veri, vëmendjen e gazetares britanike e ka tërhequr pritja tradicionale në bujtinat familjare.
Klan News
