Presidenti i Kosovës, Hashim Thaçi, ka thënë se është e rëndësishme për demokracinë në Kosovë, që Gjykata Kushtetuese të punojë e pavarur nga presionet.
Në një konferencë për media të mbajtur të premten, Thaçi ka thënë se është rëndësishme që kjo Gjykatë të punojë pa presione, as nga shoqëria civile, as nga partitë dhe e as nga bashkësia ndërkombëtare.
“Theksoj se që qenësore për demokracinë në Kosovë është që Gjykata Kushtetuese të punojë e pavarur, pa presione nga cilado palë. Askush nuk mund ta bllokojë vendin dhe institucionet e shtetit dhe për këtë arsye ftoj të gjithë që t’i kontribuojmë forcimit të institucioneve dhe rendit. Të gjithë duhet ta respektojnë procesin elektoral të 6 tetorit 2019, të respektojnë Kushtetutën dhe ligjet e vendit. Askush nuk ka të drejtë të pretendojë të mbajë të uzurpuar asnjë zyrë të institucioneve të vendit në veçanti pas vendimeve të kuvendit”- është shprehur Thaçi.
Kryetari i Vetëvendosjes, Albin Kurti që njëherësh është edhe kryeministër në detyrë i Kosovës, e ka përsëritur disa herë gjatë ditëve të fundit se qeveria në detyrë do ta vazhdojë punën deri në mbajtjen e zgjedhjeve të reja.
Kosova gjatë kohës së pandemisë është përfshirë edhe nga kriza politike, pasi Kuvendi i Kosovës më 25 mars e rrëzoi qeverinë e Kurtit, përmes një mocioni të paraqitur nga Lidhja Demokratike e Kosovës.
Pas rrëzimit të qeverisë Kurti, presidenti i Kosovës, Hashim Thaçi ka dekretuar, Avdullah Hotin, nga Lidhja Demokratike e Kosovës si mandatar për formimin e qeverisë së re.
Vendimi i tij u mor pas disa letrave që i kishte dërguar Vetëvendosjes për emërimin e një mandatari të ri. VV-ja nuk ishte përgjigjur. Por kjo parti e ka dërguar çështjen në Gjykatën Kushtetuese e cila e pezulloi zbatimin e dekretit të presidentit, deri më 29 maj.
Në fillim të kësaj jave, rreth 400 aktivistë të Vetëvendosjes u mblodhën para ndërtesës së qeverisë për, siç thanë, bërjen e përgatitjeve për organizimin e një proteste. /Opinion.al
