Presidenti i Kosovës, Hashim Thaçi është shprehur sot se takimi me homologun e tij serb Aleksandër Vuçiç në Washington, është një moment kthese për dialogun mes dy vendeve, i cili do të udhëhiqet nga SHBA.
Sipas tij, takimi në SHBA ishte inkurajues për të dy palët dhe “paraqet vullnet të mirë për paqe në Kosovë dhe Serbi dhe hapje e perspektivës ekonomike në gjithë Ballkanin Perëndimor”.
Po ashtu, Thaçi tha se është me rëndësi jetike për procesin e arritjes së marrëveshjes përfundimtare, që të dy palët të kenë besim në lidershipin e SHBA-së deri në arritjen e marrëveshjes përfundimtare.
“Takimi i Uashingtonit në mes presidentëve të Kosovës dhe Serbisë besoj se do të jetë takimi dhe momenti i kthesës kritike dhe pozitive që nën udhëheqjen e SHBA-së dhe lidershipit të presidentit Donald Trump, dinamikës dhe mençurisë së ambasadorit Richard Grenell të arrihet marrëveshja në të ardhmen e afërt. Prandaj, këtë moment dhe këtë mundësi nga Uashingtoni duhet ta shfrytëzojnë edhe Kosova edhe Serbia për arritjen e paqes si garanci për paqe në gjithë Ballkanin Perëndimor. Edhe pse po flasim për Kosovën dhe Serbinë dhe mundësinë e arritjes së një marrëveshjeje të paqes, mendoj se kjo marrëveshje do të ndikonte edhe në punën e Komisionit për të vërtetën, pajtimin dhe drejtësinë. Do të ishte hap normal që pas një marrëveshje të tillë të formohej edhe Komisioni për të vërtetën dhe pajtimin”, tha Thaçi./ Opinion.al
