Dy ndeshjet e fundit për javën e 26-të në Superligë, prodhuan rezultate surprizë.
Teuta triumfoi 2-1 me përmbysje ndaj Tiranës, në duelin direkt për mbijetesën. Kryeqytetasit kaluan të parët në avantazh me Jarmouni në minutën e 15-të, por vetëm dy minuta më vonë, durrsakët barazuan me Simeu.
Në minutën e 87-të, ishte Lloci që ktheu në gol një penallti, duke i dhënë avantazhin dhe fitoren në debutim trajnerit Bledar Hodo.
Me këtë sukses, Teuta ngjitet në vendin e shtatë me 27 pikë, ndërsa Tirana mban vendin e parafundit me 26 pikë.
Fitore surprizuese ishte ajo e Skënderbeut ndaj Egnatias. Në një takim të dominuar për shumicën e kohës, korçarët iu falën golit të Ardit Nikajt me penallti në minutën e 60-të.
Vlen të përmendet se në pjesën e parë korçarët shpërdoruan një tjetër 11 metërsh me Bismark. Kjo është humbja e parë për Egnatian në vitin 2025 dhe vjen pas 9 fitoreve radhazi. Rrogozhinasit mbeten në krye të renditjes me 48 pikë.
Skënderbeu renditet në vendin e fundit me 23 pikë, por kjo fitore jep shpresë për të ardhmen, në garën për mbijetesën.
