Një tërmet me magnitudë 5.6 të shkallës “Rihter” u shënua në ishullin e Kretës, pak minuta pas orës 11 të kësaj të mërkurë, sipas orës lokale.
Sipas Institutit Gjeodinamik të Athinës, epiqendra e tërmetit u shënua në det, 31 km në Juglindje të zonës Sitia, në Jug të ishullit të Kretës. Thellësia e tërmetit llogaritet në 10 km.
Sizmiologët deklaruan se ky ishte tërmeti më i madh dhe se nuk presin goditje tjetër sizmike gjatë orëve në vazhdim.
Prefektura e Kretës njoftoi se, deri tani janë dëmtuar lehtë disa godina të vjetra, por për fat nuk ka dëme në njerëz. Në zonën e Sitias janë dërguar disa ekipe për të verifikuar nga afër situatën.
Me vendim të Prefekturës u vendos ndalimi i mësimit në të gjitha shkollat e zonës, deri në ekspertimin e të gjitha godinave të shkollave për dëme.
Sipas sizmiologëve, zona e “legenit” të Mesdheut në Jug të Kretës është një zonë me aktivitet të madh sizmik. Edhe në të kaluarën, në këtë zonë janë shënuar tërmete deri në 6.5 ballë të shkallës “Rihter”.
