Mëngjesin e djeshëm Shqipëria u godit nga një tërmeti i fuqishëm me magnitudë 6.4 ballë, i cili la pas dhjetëra viktima dhe qindra të plagosur.
Ndërkohë, ekipet e kërkim shpëtimit janë duke vijuar punën nxjerrjen e personave të tjerë të cilët ende ndodhen nën rrënojat e banesave të shembura.
Tërmeti i fuqishëm u ndie në të gjithë Shqipërinë, duke shkaktuar dhe dëme të konsiderueshme materiale. Në Laç shumë pallate rezultojnë të pabanueshme, ku disa banesave u është vendosur edhe shiriti i sigurisë.
Në vend ndodhet ministri i Brendshëm Sandër Lleshaj, i cili po inspekton banesat e dëmtuara dhe të pabanueshme. Sipas informacioneve, në Kurbin janë 173 banesa të dëmtuara.
“Kemi kaluar natën në qiell të hapur. Shtëpinë e kam të pabanueshme”, shprehet një prej banorëve, duke kërkuar zgjidhje dhe jo thjesht çadra.
“Jemi në një situatë kritike, të ruajmë qetësinë. Kemi ofruar shërbime për qytetarët në çadrat e ngritura”, u shpreh nënprefekti i Kurbinit.
“E vetmja zgjidhje deri më tani janë çadrat e ngritura”, u shpreh nga ana tjetër përfaqësuesi i Emergjencave Civile./ Opinion.al
