Shqipëria u trondit sot nga një tërmet i fuqishëm me magnitudë 5,8 ballë me epiqendër në Detin Adriatik, 1 km larg qytetit të Durrësit.
Ndërkohë që në media raportohet për persona të lënduar dhe dëme të shumta materiale në të gjithë vendin, ministri e Brendshme përmes në njoftimi thekson se nuk ka persona të lënduar dhe as dëme të rënda materiale.
“Pas lëkundjeve të tërmetit të rënë pak minuta më parë, Ministria e Brendshme, në bazë të raportimeve të para që ka marrë nga Drejtoritë Vendore të Policisë, Shërbimet Zjarrfikëse dhe Prefekturat, njofton se nuk ka persona të lënduar dhe as dëme të rënda materiale.
Të gjitha strukturat e rendit janë në gadishmëri të plotë dhe do të marrin çdo masë për të qenë pranë dhe në shërbim të qytetarëve.
MB dhe Policia e Shtetit fton këdo që ka nevojë për ndihmë, të telefonojë në nr falas 112.
Ky është njoftim paraprak dhe pas thellimit të informacionit do të japim të dhëna të tjera.”
Por, në media raportohet me pamje dhe video se në fshatin Helmes janë shembur disa banesa dhe dy persona kanë mbetur të lënduar rëndë. Mësohet se të plagosurit po sillen drejt spitalit në Tiranë.
Po ashtu, bëhet me dije se në në zonën e “Don Boskos” është dëmtuar një pallat, ndërsa banorët po evakuohen. Dëmet ka pasur dhe në zonën e “Komunës së Parisit”, ndërsa dëmtime të konsiderueshme raportohen dhe te Gjeologjiku.
Në Durrës janë dëmtuar gjithashtu disa pallate, ndërsa banorët kanë dalë jashtë banesave.
Tërmeti i cili ra sot është më i fuqishmi në 20 apo 30 vite. Ndërkohë, bëhet me dije se tërmeti i rënë në Shqipëri, është ndier edhe në shtetin grek./ Opinion.al E.Xh.
