Shkupi është tronditur sërish mbrëmjen e sotme nga një tjetër tërmet, i cili e ka cuar në katër numrin e lëkundjeve të tokës brenda ditës së sotme. Mediat vendase njoftojnë se tërmeti është regjistruar në lagjen Novo Lisiçe në orën 20:55, por me intensitet të vogël, krahasuar me tronditjet e mëparshme gjatë ditës, ku më e madhja arriti në 5.2 shkallë sipas Rihterit.
Si pasojë e këtyre tronditjeve dhjetra pacientë janë trajtuar në spitalin e Shkupit “8 Shtatori”. Sipas mjekëvë disa pacientë u plagosën ndërsa përpiqeshin të iknin nga shtëpitë e tyre gjatë tërmetit të fortë që goditi Shkupin. Një pjesë prej tyre kanë rënë nëpër shkallë e shtëpisë apo ndërtesave, disa të tjera janë hedhur tarraca nga katet e poshtme. Ambulanca vetëm për 2 orë ka ndërhyrë në 6 pacientë të lënduar nga tërmeti. Mendohet se numri i të plagosurve i ka kaluar 50 persona.
