Ashtu siç kishin rënë dakort mazhoranca dhe opozita u ulën në tryezën e komisionit të posaçëm për Reformën në Drejtësi për të nisur dialogun politik. Mbledhja nisi në orën 11:00 dhe u mbajt larg vëmendjes së mediave.
Produkti i parë konsensual që doli nga tryeza e komisionit ishte ai për Byronë Kombëtare të Hetimit. Palët kanë rënë dakort që struktura e krijuar për të luftuar korrupsionin në nivele të larta të jetë nën varësinë e Prokurorisë Speciale, e pavarur nga Prokurori i Përgjithshëm.
Ky propozim që gjen mbështetje në opinionin final të Venecias hedh poshtë draftin aktual, sipas të cilit kreu i Byrosë emërohet nga Ministri i Brendshëm me propozim të Drejtorit të Përgjithshëm të Policisë së Shtetit, me pëlqimin të Prokurorit të Përgjithshëm. Sipas dakordësisë së arritur kjo strukturë do të jetë nën varësinë e Këshillit të Lartë të Prokurorisë.
Mësohet se për çështjen e shumëdebatuar, atë për përbërjen dhe funksionimin e këshillit të emërimeve në drejtësi palët kanë rënë dakort që zgjidhjen ta japin ekspertët të diskutohet në tryezën e dialogut politik.
Komisoni i Reformës në Drejtësi pritet të mblidhet sërish në orët e pasdites për të diskutuar dhe 9 çështjet e tjera të ngritura nga demokratët, mes të cilave përfshirjen substanciale të opozitës në emërimet e sistemit të drejtësisë, apo dhe ndërprejren e mandateve kushtetuese aktuale. /Tv Klan
*Në foto kryeministri Rama me kreun e Komisionit Fatmir Xhafa
