Tre të rinj kanë tentuar të qëllojnë me bojë kryebashkiakun Erion Veliaj gjatë festimeve të Ditës së Verës sot në Tiranë. Tre personat janë arrestuar nga policia dhe janë shoqëruar në komisariat për të dhënë sqarime, ndërsa mësohet se janë liruar pas pak orësh.
Ndërkohë, në një postim në Facebook, ish-kryeministri Sali Berisha e quan studentin që ka hedhur bojë ndaj Veliaj, hero.
“Arrestohet nga narkohorra me uniforme studenti hero i protestave qe bojatisi sot Lal Plehun! I lumte!”, shkruan Berisha.
Sot, teksa në Tiranë është festuar Dita e Verës, të rinjtë e Forumit Rinor të Partisë Demokratike dhe Lëvizjes Rinore për Integrim kanë zhvilluar marshime në Tiranë, ku kërkojnë largimin e kryeministrit Rama. Ata kanë qenë të pajisur me maska kundra gaz, ndërsa në duar mbanin parulla ku shkruhej “Rama si Asadi”, duke iu referuar gazit lotsjellës të hedhur nga autoritetet në protestat e opozitës./Opinion.al
