E vënë përpara një seri problemesh, Denada një grua nga Pogradeci në një moment dobësie vendosi t’i jepte fund jetës. Fatmirësisht ajo mundi të shpëtojë pasi djali i saj arriti në kohë në shtëpi. Denada u bë pjesë e rubrikës “Ka një mesazh për ty” në Tv Klan ku tregoi historinë e saj të trishtë dhe gjithashtu dëshironte t’i kërkonte falje djalit të saj dhe babait. 45-vjeçarja e ka nisur rrëfimin e saj duke treguar së në moshën 15-vjeçare vëllai i saj kaloi një sëmundje mendore duke u shndërruar tërësisht. Ajo theksoi se prindërit e saj u munduan shumë për të luftuar këtë sëmundje duke e çuar edhe në Greqi për t’a kuruar, por ishte tepër e vështirë. Për t’a kuruar ata shitën edhe shtëpinë në mënyrë që të kishin të ardhurat e mjaftueshme, por sërish nuk ja dolën. Më pas Denada u lidh në martesë me mblesëri me një burrë të veçantë sipas saj pasi vendosi të jetoi me prindërit e saj si dhe të marrë përsipër problemin e të vëllait. Vite më vonë 45-vjeçarja u bekua me dy djem.
“Unë kam dy djem, të madhin tetëmbëdhjetë dhe të dytin katërmbëdhjetë, por pas shumë e shumë vuajtjesh nëna u diagnostikua me kancer dhe ajo ndërroi jetë shumë e re 57-vjeçe, morëm edhe kredi për sëmundjen e nënës, por beteja ishte shumë e vështirë. Vështirësi pa fund, nëna nuk shpëtoi dot, por ka akoma edhe më shumë. Unë duhet të përballesha me bashkëshortin, sepse drejtimin e familjes e mbante nëna, tani duhet ta merrnim ne. Në një truall të babait menduam të ngrinim një biznes, mirëpo duhet të mendosh që do bësh shumë investime që të hysh në treg dhe ngritëm një lavazh për larje makinash dhe tapetesh, shtuam përsëri një tjetër kredi. Si çdo ditë që shkonim për në punë, një ditë na kishin hedhur tritol, u shokuam dhe nuk e kemi gjetur akoma, por është thjeshtë nga konkurenca, sepse nuk kemi asnjë konflikt,”-është shprehur gruaja nga Pogradeci.
Ka qenë pikërisht në këtë çast të vështirë kur ajo mendoi t’i jepte fund jetës.
“Për fat të mirë në atë moment erdhi djali në shtëpi, hyn në dhomën e gjumit, sepse do merrte çantën e sportit, por ai tani e ka lënë futbollin për shkakun tim pasi nuk kishte më forcë ishte i trembur dhe i llahtarisur. Unë isha në koma, më çoi në spital dhe më nisën me helikopter drejt Tiranës. Mbas daljes nga spitali nuk ndihesha mirë, çdo ditë mendoja si do ta lija familjen time dhe çfarë mëkati kisha bërë, e gjithë familja kaloi në traumë. Ata jetojnë me frikën se a do ta gjejnë mamin gjallë apo jo, sepse unë kam momente dëshpërimi, por mendoj se nuk do ta përsëris më kurrë, do e gjej forcën të jetoj për dy fëmijët e mi, bashkëshortin, babanë dhe vëllain. Ata kanë frikë dhe çdo ditë jetojnë me këtë frikë,”-tha Denada.
Përmes ftesës së bërë për babain dhe djalin ajo i kërkoi falje dhe u premtoi se nuk do të përsëriste më diçka të tillë, por do të bëhej e fortë për ta, për babain bashkëshortin dhe dy djemtë./Xh,K/Opinion.al/
