Një 26-vjeçar që tentoi të fuste në Shqipëri 2 armë zjarri pistoleta është vënë në pranga nga policia.
Si rezultat i intensifikimit të kontrolleve për shkak të fluksit të qytetarëve në hyrje/dalje, efektivët e Policisë Kufitare të Morinës kanë finalizuar operacionin policor të koduar “Transcendence”, si rezultat i të cilit u parandalua dhe u godit një tjetër rast i tentativës për të trafikuar armë zjarri, nga Kosova, drejt Shqipërisë.
Në kuadër të këtij operacioni, është kapur në flagrancë dhe është arrestuar një 26 vjeçar, banues në Shkodër.
Gjatë kontrollit në vijë të dytë, në hyrje të RSh-së, 26-vjeçarit i janë gjetur me vete dhe në çantë, 2 armë zjarri pistoleta, të cilat dyshohet se do të trafikoheshin në vendin tonë.
Në vijim të veprimeve, është koordinuar me Policinë e Shkodrës, ku është ushtruar kontroll në banesën e të riut, ku janë gjetur një tjetër armë zjarri pistoletë, fishekë luftarak, një sasi lënde e dyshuar narkotike cannabis sativa, 400 fara të dyshuara të kësaj bime dhe 2 targa automjeti, të cilat u sekuestruan në cilësinë e provës materiale, së bashku me 2 pisoletat që iu gjetën të riut në PKK Morinë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme, për veprat penale “Trafikimi i narkotikëve”, “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi dhe shitja e narkotikëve”.
