Para pak ditësh një video është bërë virale në media, ku shihej një grua e cila ka marrë në krahë një fëmijë dhe ka tentuar të largohet nga një market në Tiranë.
Pas denoncimit të bërë nga babai i të miturës pas ngjarjes, mësohet se gruaja është identifikuar dhe shoqëruar në Komisariat.
Sipas policisë, ajo dyshohet se vuan nga probleme të shëndetit mendor.
“Në vijim të njoftimit të dhënë më datë 15.09.2024, i cili bën fjalë për një ngjarje të ndodhur në Rrugën e Barrikadave, ku brenda një marketi një shtetase ka marrë në krahë një të mitur 2-vjeçe, ka dalë nga marketi dhe më pas është rikthyer sërish, ju njoftojmë se:
Shërbimet e Komisariatit të Policisë Nr. 3 kanë identifikuar dhe shoqëruar në ambientet e Policisë shtetasen R. B., 57 vjeçe, banuese në Tiranë, e cila dyshohet se vuan nga probleme të shëndetit mendor.
Në vijim të veprimeve u referuan materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë dhe nisi procedimi penal në gjendje të lirë për 57-vjeçaren, për veprën penale “Heqja e paligjshme e lirisë”, mbetur në tentativë, parashikuar nga neni 110/22 i Kodit Penal”, njofton policia./Opinion.al
