Policia Kufitare e Kakavijës ka arrestuar një 59 vjeçar, i cili duke përfituar nga fluksi i emigrantëve që kthehen në Greqi, tentoi të trafikonte heroinë.
Policia njofton gjithashtu se ka sekuestruar dy pako me heroinë, me peshë totale 555 gram.
Njoftimi:
Policia Kufitare e Kakavijës ka sekuestruar 555 gram heroinë dhe ka ndaluar një 59-vjeçar.
Autori ka tentuar të trafikojë heroinën drejt Greqisë duke përfituar nga fluksi në PKK Kakavijë.
Shërbimet e Policisë Kufitare në zbatim të planit të posaçëm të masave për rritjen e kontrollit me qëllim parandalimin, evidentimin dhe goditjen e tentativës për trafikim të lëndëve narkotike duke përfituar edhe nga fluksi, si dhe në bazë të analizës së riskut, në dalje të Republikës së Shqipërisë kanë përzgjedhur për kontroll të imtësishëm në vijën e dytë automjetin në pronësi të shtetasit B.R., 59 vjeç, banues në Berat.
Pas verifikimeve dhe kontrollit të ushtruar në automjet, nga punonjësit e Policisë Kufitare, në çantën e tij personale u gjetën dy pako me lëndë të dyshuar narkotike heroinë, me peshë totale 555 gramë
Veprimet hetimore dhe procedurale të mëtejshme u kryen nga specialistët e Seksionit të Hetimit të Narkotikëve në D.V.P. Gjirokastër, të cilët bënë arrestimin në flagrancë të shtetasit B.R., për veprën penale “Trafikim i lëndëve narkotike”./Opinion.al
