Kreut të grupit Parlamentar të PD-së, Gazment Bardhit, dhe deputetëve të tjerë të opozitës u është ndaluar hyrja në godinën e Kryesisë së Kuvendit. Kjo situatë ka shkatuar tensione jashtë ambienteve të Kryesisë.
Mësohet se Garda deri më tani ka një urdhër që deputetët e përjashtuar të mos futen në ambientet e Kryesisë së Kuvendit.
Kujtojmë se deputetët Ervin Salianji, Gazmend Bardhi, Bledion Nallbati, Flamur Noka, Edi Paloka, Albana Vokshi, Saimir Korreshi, Petrit Doda, Edmond Spaho dhe Lefter Gështenja janë përjashtuar nga seanca parlamentare pas incidenteve të njëpasnjëshme në sallën e Kuvendit.
Ndërkohë, e hëna nis me një agjendë të ngjeshur në Kuvendin e Shqipërisë.
Në rendin e ditës janë parashikuar 5 komisione parlamentare, ai i Ekonomisë, Ligjeve, Shëndetësisë, Politika e Jashtme dhe Veprimtaria Prodhuese ku kryefjalë do të jetë projekt-buxheti i vitit 2024.
Ndërkaq, opozita ka paralajmëruar se do të vijojë me skenarin e saj duke mos lejuar që mbledhjet të zhvillohen në normalitet.
