Ministri i Brendshëm, Taulant Balla, ka reaguar në lidhje me megaoperacionin “Tempulli 2”, ku janë goditur grupe të shpërndarjes së drogës dhe janë vënë në pranga qindra persona.
Balla tha se gjatë këtij operacioni janë sekuestruar dhe një numër i konsiderueshëm armësh pa leje.
“Kemi arritur të realizojmë një fazë të dytë të operacionit kombëtar. Ka disa suksese në fakt, ku do nënvizoja se ka qenë një operacion i madh, por suksesi i parë lidhet me faktin që nuk kemi pasur asnjë rrjedhje informacione dhe numri i madh i urdhrave të ndalimit janë realizuar dhe ndërkohë që ne flasim forcat e policisë janë në terren për të vijuar me punën. Jo pa qëllim jemi pranë një shkolle të mesme, se na duhet domosdoshmërisht ta rrisim prezencën tonë në territor për të garantuar sigurinë në shkolla. Dua të vlerësoj se edhe sasia e lëndëve narkotike është shumë e madhe krahasuar me pritshmëritë ndërkohë vazhdon puna jonë në luftën kundër armëmbajtjes pa leje. Kemi sekuestruar një numër të konsiderueshëm”, tha Balla.
Ndër të tjera Balla shtoi se do të forcohet me ligj Paketa e Sigurisë në Shkolla si dhe çdo formë e armëmbajtjes pa leje në vend. “Do fillojë dhe diskutimi publik. Do marrë fund dhe shqetësimi i krimeve në familje”, përfundoi ministri
