Kryeministri Rama dhe Kryeparlamentari Meta janë takuar për një darkë në një prej restoranteve të kryeqytetit, në një moment të vështirë të marrëdhënieve mes dy krerëve të mazhorancës. Dhe pikërisht luhatjet e raportit mes tyre, gjatë muajve të fundit, duket se janë kthyer në tema edhe më të rëndësishme se vetë sfidat me të cilat duhet të përballet një mazhorancë qeverisëse. Ata dolën të qeshur nga kjo darkë, siç dëshmojnë fotot.
Telenovela “Dashuri dhe Urrejtje” me protagonistë Edi Ramën dhe Ilir Metën, ndryshoi sheshxhirim në episodin e saj të fundit. Ndryshe nga takimet e muajve të fundit të përqëndruara te Kryesia e Kuvendit dhe Vila Qeveritare nr. 30, çifti që qeveris vendin u puq për darkë në një zonë më periferike të kryeqytetit, në restoratin e botuesit Irfan Hysenbelliu.
Takimi erdhi në një moment kur marrëdhëniet e dy krerëve të mazhorancës janë në minimumin e tyre dhe mimikat e fytyrës ishin të vetmet sinjale për mediat për të interpretuar nëse dyshja u pajtua apo jo.
Deklarata Luan Rames mbi raportin kritik të FMN-së, që nga foltorja e LSI-së tingëlloi si një test për Edi Ramën, si dhe deklarata tjetër më pas e Petrit Vasilit, në stilin tërhiq-e-mos-e-këput, ishin ndoshta prologu i takimit te mbremjes.
Rreziku i një divorci politik mes Ramës dhe Metës ka bërë që shpesh të kalojnë në plan të dytë tema dhe vendimmarrje të rëndësishme për vendin, si ekonomia, taksat dhe punësimi.
Fokusi ndërkohë është spostuar te marrëdhënia personale mes tyre: u takuan po jo? Përse u anulua takimi dhe kush e la të priste tjetrin, u kthyen në tituj mediatikë. Aq sa buzëqeshja apo fytyra e ngrysur në përfundim të takimeve, fakti nëse dolën së bashku apo njëri pas tjetrit, ia dha apo jo dorën, u kthyen të gjitha në etalonin matës të ekuilibrave brenda mazhorancës.
Ndërkohë që dy krerët e shumicës qeverisëse përpiqen ende të kuptojnë nëse mund të bashkëjetojnë nën të njëjtën çati, shtëpia e shqiptarëve vazhdon të pikojë të njëjta tjegulla të thyera si më parë. /abcnews/
