Presidenti serb, Aleksandër Vuçiç, nuk e ka fshehur zhgënjimin me qeverinë shqiptare, pas refuzimit që kjo e fundit i bëri ofertës së kompanisë serbe “Telekom Serbia” për të blerë kompaninë shqiptare “Telekom Albania”.
Për Vuçiç, refuzimi i parave serbe është një refuzim i investitorit.
“Shqipëria duke refuzuar paratë serbe në procesin e shitjes së Telekom Albania, dërgon mesazhin e gabuar, mesazhin që investitorët nuk janë të mirëpritur”.
Vuçiç shpjegoi më tej se: “Kam dëgjuar nga përfaqësuesit tanë se kemi ofruar ofertën më të mirë dhe se ministria shqiptare e telekomunikacionit tha se Serbia nuk mund të blejë Telekom Albania. Ajo dëshiron të thotë se paratë e Serbisë nuk janë mjaft të mira, gjë që do të ishte e frikshme”.
Por Presidenti serb tha se nuk do të flasë më gjatë për këtë çështje derisa të ketë në dorë të dhëna zyrtare.
Komentet presidenti serb i bëri gjatë inagurimit të fabrikës “Labor srb”, në Sremska Mitrovica.
Burime zyrtare bëjnë me dije se drejtues të lartë të kompanisë serbe janë takuar me përfaqësues të ministrisë së Transporteve.
Gjatë këtij takimi drejtuesve të “Telekom Serbia” i është bërë i ditur edhe qëndrimi i palës shqiptare se nuk janë të mirëpritur për tu bërë pjesë e tregut të telefonisë mobile edhe pse investimet serbe janë të rëndësishme për Shqipërinë.
“Ardhja e kompanisë Telekom Serbia në Shqipëri nuk është e mirëpritur. Edhe pse vendimi është midis kompanive, përfshirja e Telekom Serbia në tregun e telefonisë celulare mund të sjellë reagime që mund të ndikojnë negativisht edhe për vetë kompaninë. Ne jemi të gatshëm të presim investimet serbe në vend, por për këtë sektor preferojmë një investitor me një tjetër profil.”
Mësohet se Telekom Serbia ka bërë ofertën më të favorshme për blerjen e Telekom Albania duke ofruar 60 mln euro, shkruan Ora News.
