Aktori i mirënjohur Mehdi Malkaj mbajti fjalën e tij sot në protestën e thirrur nga Aleanca për Mbrojtjen e Teatrit. I njohur si një ndër aktivistët e parë për mbrojtjen e godinës, Malkaj tha se pavarësisht se godina u shemb, “teatri nuk ka vdekur”.
Ai tha se ligji është shkelur i pari nga kryeministri i Shqipërisë dhe theksoi se vendit i duhet kthyer demokracia.
“Teatri nuk ka vdekur është këtu. Rroftë Teatri! Këtu tek ne në fillim doli banda, pastaj doli kontrabanda, pastaj anti-kontrabanda. Ky vend do të rregullohet kur të zhduken këto të treja. Dhe këto banda, kontrabanda dhe antikontrabanda, së pari duhet vendosur demokracia dhe për mua demokraci do të thotë diktaturë e ligjit, që nga kryeministri. Jo sa del një ligj i pari, e shkel kryeministri. Kjo është kuja.”- tha aktori.
Malkaj nuk kurseu edhe ironinë për kryetarin e Bashkisë së Tiranës e cila ngjalli edhe shumë ovacione nga protestuesit.
“Qenkeni futur dhe nga territori i bashkisë mor aman”, tha ai duke iu referuar me ironi vendimit të qeverisë për kalimin e pronës së teatrit Bashkisë së Tiranës, vendim ky që u ndoq më vonë nga shembja e godinës mëngjesin e së Dielës. /Opinion.al
