TIRANE- Rrjetet sociale kanë zier sot nga akti i policisë bashkiake për të gjobitur një grua në moshë e cila kishte zënë një qoshe dhe shiste qepë e spinaq për të fituar kafshatën. Sakaq reagoi Bashkia, duke thënë se ky është një aksion për lirimin e hapësirave publike. Por pati edhe një lloj ndjese nga kryebashkiaku për këtë veprim të policisë së tij. Ai njoftoi se ka paguar gjobën e kësaj nëne që u gjobit me 5 mijë lekë se kishte zënë një qoshkë në kryeqytet, pa leje…. Por rrjetet nuk janë ndalur me kaq, ja ku është një foto e bërë pak ditë më parë kur kryebashkiaku përqafon një nënë për 8 Mars dhe ja ku është dy ditë më pas, duke i gjobitur për një tufë qepe…
Një këndvështrim tjetër është ai i Dom Gjergj Metës, i cili ka shkruar se kjo është lufta e varfërisë. Nga njëra anë nëna e moshuar që lufton për kafshatën e bukës dhe nga ana tjetër polici i bashkiakes që detyrohet të mbajë vendin e punës, edhe ai i varfër.
