Teatri Kombëtar, Rama: Disa të rinj u janë bashkuar partive të tallashit

Mëngjesin e sotëm kryeministri Edi Rama ka reaguar përsëri në lidhje me çështjen e Teatrit Kombëtar. Teksa shpërndan disa foto nga inspektimi i punimeve në Teatrin e ri të Operas dhe Baletit, Rama shkruan se 20 vite kanë shkuar dëm dhe se punimet dushet të kishin filluar kohë më parë.

Në lidhje me Teatrin Kombëtar, kryeministri shprehet se artistët shqiptarë u shuan pa punuar një ditën në një skenë normale.

Ndër të tjera Rama shkruan se; “Skenat e reja kombëtare, kjo e Operas e Baletit dhe ajo e Teatrit Kombëtar, përveç të tjerash do t’i ndihmojnë edhe disa të rinj që gabimisht u janë “bashkuar” ca politikanëve e partive si tallashi e teneqeja e ngrehinës së shembur, të kuptojnë nesër pse sot ia fusin krejt kot, kur revoltohen për monumentin imagjinar që mbajti peng artet skenike, komunitetin teatror dhe debatin për Teatrin e Ri Kombëtar, tash 21 vjet.”

Ditën e djeshme “Aleanca për Mbrojtjen e Teatrit” e mbështetur nga opozita protestuan kundër projektit të ri të Teatrit Kombëtar, ndërsa akuzuan dhe kërkuan dorëheqjen e kryeministrit Rama dhe krybashkiakut të Tiranës, Erion Veliaj.

Postimi i Ramës

MIRËMËNGJES! Dje, duke vizituar kantierin e Teatrit të ri të Operas dhe Baletit, ku po përfundon një transformim fantastik brenda asaj hapesire deri dje të degraduar që turpëronte Shqipërinë e shtetin e saj, m’u kujtua që 21 vjet më parë, tamam në të njëjtin vend mbi skenë, nisi beteja publike për reformimin e sistemit teatror shqiptar dhe rindërtimin me themel të skenës kombëtare e të vetë Teatrit Kombëtar… Sa shumë energji të harxhuara e vite të humbura kot për komunitetit tonë teatror, që qysh atëherë kaloi edhe 20 vjet të tjera në kushtet e një mizerjeje pa të dytë në Europë dhe sa keq për publikun artdashës, që nuk pati dot kurrë mundësinë të shijonte artet skenike në kushte dinjitoze as në TKOB e as në Teatrin Kombëtar! Sa keq që tërë ato yje të skenës sonë kombëtare u shuan, pa punuar dot një ditë në një skenë normale dhe një gjeneratë e tërë u moshua, pa shijuar dot kurrë një shfaqje në kushte normale! Skenat e reja kombëtare, kjo e Operas e Baletit dhe ajo e Teatrit Kombëtar, përveç të tjerash do t’i ndihmojnë edhe disa të rinj që gabimisht u janë “bashkuar” ca politikanëve e partive si tallashi e teneqeja e ngrehinës së shembur, të kuptojnë nesër pse sot ia fusin krejt kot, kur revoltohen për monumentin imagjinar që mbajti peng artet skenike, komunitetin teatror dhe debatin për Teatrin e Ri Kombëtar, tash 21 vjet./Opinion.al