Një ditë pas pezullimit nga detyra të gjyqtarit të Beratit, Shyqyri Çobo, për ngacmim seksual kanë dalë të tjera dëshmi. Një tjetër grua që ka qenë në proces divorci thotë se ka patur në njëjtin problem me Shyqyriun.
Gruaja me iniciale E.B. ka lënë një koment në statusin e avokatit penalist Saimir Vishaj në facebook, shkruan portali Hashtag.al që ka postuar edhe denoncimin e gruas së dytë që ka rënë pre e ngacmimeve të gjyqtarit.
“S’ka nevojë për shumë komente z.Sajmir. Akuza kundrejt zotërisë në fjalë është më se e vertetë. Unë jam një ndër ato gra apo nëna që zgjidhjen e martesës e ka gjykuar ky zotëri dhe ju e dini qe s’jam e vetmja që jam provokuar prej tij. Por hallet e problemet e mia më bënin që t’ja harroja”surratin” e të mendoja për më tej për jeten time…(ose ndoshta nuk gjeta kurajon të bëja të njëjtën gjë).” Eshtë ky komenti i gruas me E.B lënë në statusin e avokatit.
Kujtojmë se një ditë më parë prokuroria bëri të ditur se ka nisur hetimi ndaj gjyqtarit Çobo, pas denoncimit të gruas Irma T. 32 vjeç nga Berati. Ajo i ka dhënë prokurorisë edhe sms që i kishte dërguar Shyqyriu që lënë dyshime se po kërkonte favore seksuale. Gruaja ishte në proces divorci dhe gjetja e një avokati ka qenë preteksti “i miqësisë” mes tyre.
Disa nga sms e Shyqyriut për gruan I.T. nga Berati
SMS 1- Të këshilloj tepër miqësisht që në konceptin apo në filozofinë perceptuese mos reflekto mendësi fshatareske të natyrës provinciale duke u munduar të tregosh moral, koha ka evoluar, ndaj duhet të jesh më elokuente me veten dhe në shoqëri, OK?
SMS 2- “Zogu” – do më vinte mirë të të thërrisja kështu se si “zogë” je! OK??
SMS 3- Është e vërtetë që je “Tip i vështirë” në raportin komunikues, por “Tip inteligjente” me performancë femërore tepër perfekte.. Ke vlera në vetvete! Të respektoj dhe nuk dua të të humbas ! Ok ?
SMS 4- …. “Mirëmëngjes”!! Po të shkruaj shpejt. Zgjohem në orën 04:00 dhe ora 05:30 nisem për në punë. Unë gjykoj se ti duhet të njohësh madje dhe të administrosh vlerat të cilat s’të mungojnë.. Ti gëzon simpati, inteligejncë dhe një komunikim tepër komplimentar. Je tepër femërore. Për këtë shkak duhet të jesh KRENARE! Respekte.
SMS 5 – “Përsa i përket çështjes të cilën natyrshëm Ti e ke “gangrenë” sinqerisht do kesh suport gjithë “kredinë” time juridike ..! Ok ?? Së dyti në kondicionin social në perceptimin tim aktualisht je “skanuar” femër (mami) tepër bashkëkohore potente plot vizion… Ky është dhe “motivi” imponues i imi që ti të jesh mikesha ime konseguente. Nuk dua të gjykoj se ti je një zonjë provinciale me mendësi fshatareske.. Fundja në CV-in tënde je dikush..Shpresoj mirëkuptimin tuaj..! Ok??”.
SMS 6 – “Psikoanalisti austriak Sesil Frojd shkruan se ‘kur je i martuar dhe ke një te dashur ky është komoditet, nëse i dashuri është dikushi atëherë ky është luks ”.
SMS 7- Përshëndetje! Gëzon të gjithë kredinë mirënjohëse nga ana ime. “Performanca” juaj më imponoi respekte, pse jo dhe ndjesi. A u sqarove me avokatin rekomandues. “Problemi” sinqerisht më diktoi keqardhje…Mos hezito me sms apo me tel…do të mirëpres. Respekte! Ok?
SMS 8 – Uroj që në “Raportim” komunikues midis nesh do gëzosh mirëkuptimin tim..gjykoj se duhet të evitosh druajtjen…! Me vlerëso konfidencial dhe si “Mike” të hershme, do të mirëkuptoj..,Ok??
SMS 9- Brishtësia e performancës tënde më krijoi mirënjohje..këtë fundjavë do të jem në Malin e Zi. Komunikimi me ty, objektivisht është kënaqësia..telefonata apo sms e tua nuk më shkaktojnë bezdi, përkundrazi i mirëpres..je shumë e këndshme..të adhuroj..më mirëkupto. Ok.!
