Nga Dritan Laci
Sa herë që vjen fundviti zërave të kërkesave të shumta që sjell nevoja për një qytet europian si Tirana. u shtohen edhe ato të Shoqatës së Transportit Ndërqytetas, të cilët herë pas herë në vitet e fundit kanë kërkuar rritjen e çmimit të biletave për udhëtarët që zgjedhin transportin publik për të mbaruar punët e tyre të përditshme.
E tillë është edhe kërkesa e fundit, ku shoqata përfaqësuese e këtij transporti kërkon të rrisë biletën e urbanëve mbi masën dyfish aktuale, nga 30 (0) lekë në 70 (0) lekë.
Madje duke kërcënuar bashkinë dhe qytetarët se më datë 1 janar 2016. do të ndërpresë shërbimin e transportit publik në Tiranë.
Por mbi ç’merita e parashtron kjo shoqatë këtë kërkesë? Le ti marrim një e nga një. Duhet bërë 70 (0) lekë sepse ky shërbim ka treguar kohë pas kohe progres në cilësinë e shërbimit ndaj qytetarëve? Unë mendoj që Jo. Si një udhëtar i shpeshtë i zallamahisë dhe e thënë ashiqare-popullorshe i qelbsinllëkut ku vazhdon të katandiset ky shërbim, nuk kam asnjë arsye të shpenzoj qoftë edhe një qindarkë më shumë për këtë shërbim.
Sepse edhe nëse e marr të mirëqenë premtimin e Shoqatës së Transportit Publik, se me rritjen e biletës do të rritet cilësia, përse duhet ta kem një besim të tillë, kur e njëjta gjë u tha edhe kur bileta u rrit me 30 (0) lekë.
E dyta-kush më siguron se me rritjen e çmimit të biletës, do shkoj më shpejt në punë? Askush. Sot të gjithë e dimë që të shkosh nga një cep i Tiranës në tjetrin, arrin më shpejt me avion në Athinë, se sa në shtëpi. Dhe kjo jo prej trafikut, siç kërkon të justifikohet Shoqata e Transporteve, por për mos respektim të frekuencave të lëvizjes së urbanëve.
Sa njerëz janë sot të gatshëm të rrefejnë stresin që heqin nëpër urbanë duke pritur me minuta të tëra që urbani të lëvizë nga vendi. Kam përshtypje që janë shumë, të cilët e heqin në kurriz këtë torturë çdo minutë të lëvizjes së tyre me urbanë.
E treta-Kush më siguron që me rritjen e çmimit, shërbimi brenda urbanëve do të jetë më i mirë se ky që është tani. Që nuk do të dal nga urbani i zhgarravitur nga mbipopullimi dhe kundërmimi i fatorinove të parrojtur dhe që nuk dihet kur kanë parë ujë për herë të fundit?
Kam përshtypjen që edhe këtë nuk e siguroni dot se ka kohë që fatorinot nuk i paguani, nuk pres që ata të kenë higjienë më të pastër. Jo më larg se sot hasa me një fatorino të cilin e dallova vetëm nga refreni: “Lekë-Abone”, pasi nuk kishte asnjë shenjë identifikuese nga masa e udhëtarëve që shtyheshin e përpëliteshin duke numëruar me padurim stacionet, në mënyrë që ti jepnin fund këtij makthi.
E pra më jepni një arsye përse duhet ta paguaj 70 (0) lekë biletën, apo që të dëgjoj injorancën e një fatorinoje i cili ka mësuar nga shefi i tij se: “Urbani është privat, po deshe mirë po s’deshe merr taksi”.
Jo zotërinj të Shoqatës së Transportit Ndërqytetas nuk është kështu. Transporti është publik, mjeti është privat, ndaj edhe kur të kërkoni një rritje të tillë, duhet të bindeni se qytetari është mbi të gjitha.
Nëse do të kishte një Agjenci të Mbrojtjes së Konsumatorit, e cila ekziston vetëm si institucion në varësi të Bashkisë, pasi kam dyshime për rolin e saj të vërtetë, me këtë mos-shërbim dhe tallje të vazhdueshme me qytetarët, ju siguroj që jo vetëm nuk do kërkonit rritje të biletës por shumë nga linjat tuaja të urbanëve duhet të kishin kapitulluar, me mungesën e standardeve.
Dhe e fundit përse duhet ta pranoj rritjen e çmimit të biletës kur kushtet e kondicionimit janë mizerabël si në verë dhe në dimër? Kur verës të shkojnë djersët çurg dhe dimrit rroftë fërkimi i prapanicave të ngjeshura sa ska më, për t’u ngrohur disi.
Përse duhet të të jap 70 (0) që ta pësoj si ai xhaxhai i moshuar disa ditë më parë që e shqepët në grushta dhe shkelma, vetëm e vetëm se kërkonte që të ikte më shpejt në shtëpi. Po sa raste të tilla ka që nuk janë dokumentuar nga mediat? Ja, po ju a them unë. Ka shumë.
Dhe çfarë keni bërë ju për ta përmirësuar disi më mirë standardin e udhëtimit brenda Tiranës? Asgjë! Thjesht kërkoni të rritet çmimi i biletës, po nuk keni dalë qoftë edhe njëherë të vetme, të kërkoni ndjesë për shërbimin e dh… të urbanëve në Tiranë. Ndaj sot kërkoj nga ju dhe nga kryetari im i bashkisë një motiv të vetëm, përse duhet tju japim një çmim të tillë bilete?
Video kur në i moshuar u rrah nga fatorino disa ditë më parë se u ankua për vonesën në stacion
