Dy të rinj janë arrestuar nga policia në lidhje me ngjarjen e djeshme të ndodhur në Elbasan ku gjatë një konflikti pranë stadiumit të qytetit u qëllua me armë zjarri.
Nga të shtënat mbeti i plagosur lehtë Elvis Koçi (Çaushllari), 28 vjeç, banues në Elbasan, i njohur si “Vis korçari”. Për t’i shpëtuar Policisë, ka tentuar të mjekohej në spitalin ushtarak në Tiranë, por është arrestuar në flagrancë disa orë më vonë.
Policia shpalli fillimisht në kërkim autorin e dytë të kësaj ngjarjeje, Migert Qosja, 25-vjeç. Por sot bëhet me dijse se janë arrestuar edhe dy 21-vjeçarë. Konkretisht, F. F., 21 vjeç, banues në Elbasan, për veprat penale “Vrasje me dashje” e mbetur në tentativë e kryer në bashkëpunim dhe “Armëmbajtja pa leje” dhe E. C., 21 vjeç, banues në Librazhd, për veprat penale “Veprime që pengojnë zbulimin e së vërtetës” dhe “Moskallëzim krimi”.
Gjithashtu, si rezultat i këtyre hetimeve është shpallur në kërkim policor, për veprat penale “Vrasje me dashje” e mbetur në tentativë, e kryer në bashkëpunim dhe “Armëmbajtja pa leje” shtetasi A. C., 21 vjeç, banues në Elbasan.
Materialet hetimore i kaluan Prokurorisë pranë Gjykatës së Shkallës Parë Elbasan, për veprime të mëtejshme procedurale./ Opinion.al
