Të shtëna me armë zjarri janë shënuar në kryeqytetin suedez, Stokholm, ku si pasojë një djalë 15-vjeçar humbi jetën dhe 3 të tjerë u plagosën.
Policia tha se motivi i ngjarjes ende nuk është përcaktuar.
Mediat e huaja shkruajnë se autoritetet morën raporte për të shtëna pranë një sheshi në jug të Stokholmit në orët e hershme të mbrëmjes dhe gjetën dy persona me plagë me armë zjarri në vendngjarje.
Dy të plagosur të tjerë u gjetën aty pranë, njëri prej të cilëve humbi jetën.
“Personi që vdiq në vendngjarje është një djalë 15 vjeç”, tha për AFP Towe Hagg, zëdhënëse e policisë së Stokholmit.
Një tjetër djalë 15-vjeçar u plagos, si dhe një burrë dhe një grua nga mosha 45 deri në 65 vjeç, tha policia në një deklaratë.
Autoritetet shtuan se dy burra ishin arrestuar pas një ndjekjeje me makinë në jug të Stokholmit pak më pak se një orë pas të shtënave.
Policia tha se kishte nisur një hetim për vrasje dhe tentativë vrasjeje.
Suedia ka luftuar për të frenuar një rritje të të shtënave dhe bombave në vitet e fundit, pasi bandat zgjidhin llogaritë e nxitur nga tregtia e narkotikëve.
