Edhe pse Bashkimi Europian në strategjinë për vitin 2020 ka vendosur në 40% normën që çdo shtet duhet të ketë për personat me arsim të lartë, në raport me popullsinë e përgjithshme, Shqipëria është e para ndër vendet e Ballkanit Perëndimor, sa i përket normës më të lartë të të rinjve që janë mjaftuar vetëm me shkollim 9-vjeçar.
Pavarsisht asaj që kërkon BE-ja, norma në Shqipëri arrin në 23.5%, për ata që janë mes 30 dhe 34 vjeç. Edhe pse në krahasim me vitin 2012, kjo normë është rritur ndjeshëm, me rreth 8 pikë përqindje, përsëri vendi ynë renditet i fundit në rajon madje dhe mes vendeve kandidate, ku përfshihet edhe Turqia.
Sipas publikimit më të fundit nga Eurostat, meshkujt e moshës 18 deri në 24 vjeç që nuk kanë një arsim mbi atë 9 vjeçar është 22%, ndërsa vetë Bashkimi Europian kërkon që kjo normë mos të jetë më e lartë se 10%. Tek femrat ndërkohë, norma zbret në rreth 17%. /Opinion.al
