Protesta e 8 e opozitës nisi me forma të ndryshme për të ironizuar edhe vizualisht qeverinë. Pas publikimit të përgjimeve nga gazeta gjermane “Bild”, të rinjtë e forumit rinor të PD-së kanë improvizuar një qeli me dy persona brenda saj, të cilët mbajnë maska të Kryeministrit Rama dhe të Vangjush Dakos.
Ata e quajnë “qelia 339”, referuar edhe dosjes. Opozita dhe mbështetësit e saj synojnë që kjo protestë të realizojë largimin e kryeministrit Rama dhe rrëzimin e qeverisë së tij të akuzuar prej saj, se ka fituar mandatin e dytë qeverisës përmes shit-blerjes së votave dhe lidhjeve me krimin.
Në një konferencë për shtyp, të premten në mbrëmje, Lulzim Basha, u bëri thirrje qytetarëve të bashkohen dhe të marrin pjesë masivisht në protestë, për të bërë të mundur atë që ai e quajti, “çrrënjosje të modelit kriminal që ka instaluar Rama, pastrim të sistemit politik, largim njëherë e mirë të drejtimit kriminal të qeverisjes në Shqipëri”./ Opinion.al
