Avokati i ish-kryeministrit Sali Berisha ka kërkuar në Këshillin e Mandateve dhe Imunitetit pezullimin e seancës ku po shqyrtohet kërkesa e SPAK për autorizim për ashpërsimin e masës së sigurisë ndaj, ish-kryeministrit, Sali Berisha.
Avokati kërkoi që të shtyhet mbledhja deri në shprehjen e Gjykatës Kushtetuese për masat e sigurisë të dhëna ndaj ish-kryeministrit Sali Berisha, në lidhje me nenin 73.
Kërkesa u rrëzua nga socialistët, duke thënë se nuk ka asnjë bazë ligjore, pasi deputetët demokratë kanë çuar në Kushtetuese kërkesat për masat e sigurisë dhe jo procedurën parlamentare.
“Nuk ka asnjë bazë proceduriale për të kërkuar pezullimin, Në kërkesën tuaj ju po të ishit të interesuar mund të kërkonit në Gjykatën Kushtetuese gjënë që po na kërkoni ne. Ju keni kërkuar pezullimin e masave shtrënguese, apo ndonjë mase të mundshme, por nuk keni kërkuar pezullimin e procedurave parlamentare. Kështu që për mendimin tonë nuk ka asnjë kusht ligjor, por edhe asnjë arsye ta pezolullojmë. Të vazhdojmë procesin me dëgjimin e dy palëve të interesuara”, tha kreu i grupit parlamentar Bledi Çuçi.
Edhe Kryetarja e Kuvendit u shpreh se mbledhja duhet të vijojë, pasi kërkesa e avokatëve nuk ka bazë ligjore dhe proceduriale.
“Është një kërkesë që s’ka bazë ligjore dhe vijojmë me procedurën”, tha Nikolla.
Kërkesa u hodh në votim dhe u rrëzua me 6 vota kundër.
5 votave të socialistëve, iu është bashkuar edhe Enkelejd Alibeaj, i cili ka dalë kundër argumenteve të mbrojtësve të ish-kryeministrit, Genc Gjokutajt dhe Sokol Mengjesi.
