Ministrja e Arsimit, Lindita Nikolla u ka dërguar nga një letër të personalizuar mësuesve në mbarë vendin. Më saktë teksti është i njëjtë për të gjithë, ndërsa emri është me shkrim dore. Në këtë letër që vjen në pragun e festave dhe ku ende nuk është përcaktuar asgjë për shpërblimin e fundvitit, Nikolla thotë se “bashkë kemi realizuar reformat”.
Mësuesit nuk kanë njohur asnjë rritje rroge prej vitesh, por Nikolla u thotë se duhet të presin, se në 2017-ën pagat do rriten me 10 për qind.
Ministrja u drejtohet mësuesve me fjalët se reformat mbase i kanë stresuar por kanë sjellë rezultate. Sipas saj nuk ka më tekste me gabime. “Janë hequr 600 tekste me gabime nga tregu”, shkruan ajo në letrën për mësuesit. Po kështu shkruan Nikolla, i kemi dhënë fund mbingarkesës në gjimnaze dhe çoroditjes së nxënësve.
Të letër evidentohet fakti se tani nuk paguhet rryshfet për vendet e punës dhe nuk ka as ndikime partiake në emërime.
Por në letër nuk flitet për kushtet e punës. Në shumë shkolla, në zonat urbane bëhet mësim me turne. Ka mbingarkesë me 40 nxënës në klasë. Po kështu në shumë shkolla mungon ngrohja, etj. Kabinetet e famshme të informatikës mungojnë. As një fotokopje nuk ka në shkollat publike. Të gjitha këto dhe më kryesorja motivimi financiar janë ato që vertet presin mësuesit…
