Komisioni i Jashtëm në Kuvendin e Shqipërisë ka bërë bashkë socialistët dhe demokratët në një çështje: komentimin e deklaratave të ish-Kryeministrit Pandeli Majko për zgjedhjet në PS dhe cilësimin e Kryeministrit Rama si “kokderr”.
Ishte ish- socialisti Kastriot Islami, ai që sugjeroi i pari se në pushimin e mbledhjes duhej të flitej për statutin e PS dhe deklaratën e Majkos, sipas të cilës Blushi kishte të drejtë që statuti është shkelur në kapitullin më të rëndësishëm, atë të zgjedhjeve, por se ai mbështeste kryetarin e PS-së, Edi Rama.
Ndërsa Arta Dade u kujtoi kolegëve se duke respektuar statutin, Majko u bë kryeministër në shkurt të vitit 2001 dhe po në respekt të Kushtetutës së partisë dha dorëheqjen në korrik të këtij viti, kur socialistët vendosën të bashkojnë postin e kryetarit me atë të kryeministrit, dhe Fatos Nano automatikisht me këtë ndryshim u bë kryeministër.
Dade: Po u them një të vërtetë, Pandi është bërë kryeministër në ’98 për shkak të zbatimit të statutit. Meqenëse kryetari i partisë dhe ish-kryeministri dha dorëheqjen, në bazë të statutit i vjen radha numrit dy të partisë që të bëhet kryeministër dhe kështu që u bë Pandi. Në zbatim të statutit, po.
Deputeti demokrat, Eduart Selami, ironizoi: Selami: Blushi ka të drejtë, por unë jam me Ramën…
Dade: Ai tha e mbështes Blushin për statutin, por unë jam me Ramën.
Selami: Po ai ka të drejtë, si mund të ketë të drejtë?
Dade: Të gjithë duhet të jenë me statutin dhe zbatimin e ligjit për mendimin tim.
Batutat zgjuan interesin e gazetarëve, por zonja Doda zgjodhi tu jepte një tjetër mesazh gazetarëve:
Këta mua më duan kur fillojmë flasim.., se në fakt mua si kryetare të Komisionit nuk më nxjerrin asnjëherë, as kur hap mbledhjen. Tani këto janë shumë interesante (merr në dorë mikrofonin).
Këto diskutime u bënë në praninë e vetë deputetit Ben Blushi, që nuk reagoi në asnjë moment por qëndroi si spektator duke shoqërur me buzëqeshje fjalët e kolegëve.
