Autoriteti i Konkurrencës do të nisë hetimin ndaj sistemit bankar. Shkak është diferenca e lartë në normat e interesit që aplikohen për kredi dhe overdraft kundrejt atyre të depozitave.
Për diferencën e lartë mes normave të interesit të kredive konsumatore, overdrafteve dhe depozitave, Shqipëria renditet e katërta në rajon,
duke lënë pas Kosovën, Serbinë, Malin e Zi, madje dhe Bullgarinë. Të dhënat për fitimet e larta të bankave vijnë pas monitorimit që
Autoriteti i Konkurrencës i ka bërë tregut bankar.
Në raportin e 2015, Autoriteti sqaron se monitorimi i tregut u krye pas shqetësimeve të shumta që janë ngritur në media, që bankat aplikojnë norma të larta interesi të kredive dhe norma të ulëta interesi për depozitat.
“Në përfundim të analizës së treguesve të sistemit bankar në tërësi dhe e sjelljes së bankave të nivelit të dytë në tregun përkatës, overdraft
dhe kredi konsumatore, u konstatua se tregu bankar paraqitet mesatarisht i përqendruar, ku asnjë nga bankat e nivelit të dytë nuk ka pozitë të ndjeshme në treg. Bankat aplikojnë norma të ndryshme për tre produktet bankare të analizuara.
Diferenca midis interesave të kredive me depozitat dhe i interesave të overdraftit me depozitat për gjithë sektorin bankar është shumë i lartë. Krahasuar me 8 vendet e rajonit në lidhje me spreadin e interesave të kredive me depozitat, Shqipëria radhitet e katërta, duke lënë pas vendet si Mal i Zi, Kosova, Serbia dhe Bullgaria, të cilat kanë spreadin apo diferencën mes interesave të kredive dhe depozitave me të vogël”, sqaron Autoriteti i Konkurrencës.
