Fatos Nano ka vendosur të mos shkojë në Kongresin e Partisë Socialiste, i cili ka qenë tepër hermetik. Gazetarët nuk janë lejuar të futen në sallë, por e kanë ndjekur nëpërmjet një monitori në hollin e Pallatit të Kongreseve, ndërsa pamjet e transmetuara në televizione kanë qenë me regji qendrore duke nxjerrë më të mirën e aktivitetit.
Nga ministrat që folën, u pasqyrua një Shqipëri tjetër, jo ajo është në të vërtetë. Folën vetëm për arritje, suksese dhe asnjë përgjegjësi nga vetja, duke mos harruar të falënderonin gjithmonë kryeministrin Edi Rama.
Ndryshe nga Kongreset e fundit, ku ka pasur edhe fjalime kritike apo edhe kundër qeverisë socialiste, si për shembull nga ish-deputeti Ben Blushi, këtë herë Kongresi ngjasonte me ato të Partisë së Punës. Madje Ministri i Bujqësisë Bledi Çuçi dhe Ministrja e Marrëdhënieve me Parlamentin, e nisën fjalimin me togfjalëshin “shokë dhe shoqe”.
Një nga qytetarët, që kishte arritur të zgjidhte problemin me platformën “Shqipëria që Duam”, gjatë fjalës së tij, duke i uruar shëndet kryeministrit, i kërkoi që të mos rresht “për ta çuar Shqipërinë në ato porta që kërkojnë shqiptarët”. Kjo deklaratë shkaktoi të qeshura në sallë./Opinion.al
