Kryeministri Edi Rama i ka kërkuar disa herë publikisht drejtorit të Përgjithshëm të Policisë së Shtetit, Haki Çakos, që të marrë masa kundër atyre personave që lëvizin me makina luksoze, të armatosur dhe që “sfidojnë me prezencën e tyre perceptimin e komunitetit për çfarë duhet të bëjë dhe si mund të jetojë një qytetar në këtë vend me punë të ndershme”.
Deri më tani, rezultatet e Çakos në këtë drejtim kanë qenë të pakta, ndonëse ka disa lëvizje pozitive.
Ndërkohë, ish-kryeministri Sali Berisha ka publikuar në profilin e tij në ‘Facebook’, foton e djalit të kryebashkiakut socialistë të Kurbinit, Artur Bardhi, i cili lëviz me makinë luksoze dhe i armatosur.
Kevi Bardhi u bë i njohur për publikun në tetor të 2016-ës ku aksidentoi me makinë tre persona, mes tyre një efektiv policie.
I riu u arrestua nga policia, por u la më pas i lirë, dhe sot, bazuar në foton e publikuar nga Berisha, lëviz me armë dhe makinë luksoze duke “sfiduar me prezencën e tij perceptimin e komunitetit për çfarë duhet të bëjë dhe si mund të jetojë një qytetar në këtë vend me punë të ndershme”.
