Monedha vendase ka fituar pikë gjatë ditës së sotme, si ndaj euros ashtu dhe dollarit.
Sipas të dhënave të Bankës së Shqipërisë, një euro u këmbye sot me 137.49 lekë, 0.29 lekë më pak se fundi i javës së kaluar.
Tkurrja e dollarit ka qenë më e lartë, duke u këmbyer me 126.55 lekë, 0.74 lekë më pak se të premten.
Aktorët e tregut pohojnë se në përgjithësi është mbingopja e tregut me valutë, ajo që po forcon monedhën vendase, për disa arsye, edhe sezonale, por ka edhe faktorë unikë që po ndikojnë në këtë periudhë të fundit të vitit.
Së pari, agjencitë e këmbimit kanë vënë re se bizneset po nxitojnë që të konvertojnë valutën, në mënyrë që të shlyejnë detyrimet e tyre, teksa nuk arrijnë të sigurojnë likuiditetet e nevojshme përmes aktivitetit normal, duke konsumuar në këtë mënyre rezervat e tyre, kryesisht në euro.
Kjo tendencë është ndier dukshëm, pasi ka filluar aksioni anti-informalitet dhe ka dhënë efekt në forcimin e lekut, që po shfaqet i fortë kundrejt euros që nga shtatori (shiko grafikun).
Së dyti, këto ditë është shtuar dhe pjesa e stimulimit të festave, teksa ata që duan të bëjnë dhuratat në lekë po këmbejnë valutat e tyre.
Ka dhë një prurje të shtuar nga emigrantët, tendencë tradicionale e çdo fundviti kjo, por që gjithsesi është më e ulët në krahasim me vitet e mëparshme.
Edhe në sistemin bankar ka një mbingarkesë të këmbimeve valutore (kryesisht në shitje valute), dhe për shkak të volumeve të mëdha që kryejnë, bankat janë diktues të tregut sot.
