Pasi zhvilluan takime me Kryeministrin Rama, Ministrin e Brendshëm Lleshaj, Ministrin në detyrë për Evropën dhe Punët e Jashtme Cakaj si dhe me kryetarin e Partisë Demokratike, Basha dhe përfaqësues të shoqërisë civile Christian Hellbach dhe Thomas Ossowski, dy përfaqësues të qeverisë Gjermane, me anë të një deklarate të përbashkët e kanë cilësuar si të gabuar vendimin për djegin e mandateve, si dhe u kanë bërë thirrje të gjitha partive të tregojnë përgjegjësi përkundrejt zgjedhësve të tyre dhe të marrin pjesë në zgjedhjet vendore të datës 30 qershor.
Teksa theksojnë se i kanë dëgjuar me vëmendje të gjithë palët, Hellbach dhe Ossowski, pohojnë se e drejta për të protestuar është një element i rëndësishëm i kushtetutshmërisë demokratike por dhuna është e papranueshme dhe vënë theksin tek Parlamenti:
“Është detyra e të gjithë deputetëve të zgjedhur, pikërisht në parlament, me angazhim dhe në mënyrë konstruktive, të çojnë përpara reformat e nevojshme dhe të arrijnë rezultate konkrete. Shqipëria është, p.sh. në reformën e drejtësisë, në rrugë të mbarë. Kurse bojkoti i parlamentit dhe sidomos dorëzimi i mandateve është për ne i gabuar”.
Të dërguarit e Merkelit iu kanë bërë gjithashtu thirrje të gjitha partive të marrin pjesë në zgjedhje vendore.
“Ndaj u bëjmë thirrje të gjitha partive të tregojnë përgjegjësi përkundrejt zgjedhësve të tyre dhe të marrin pjesë në zgjedhjet vendore të datës 30 qershor.”
Sipas tyre besimi në forcën e votës vjen vetëm me një parlament funksional, dhe duke punuar për reformën zgjedhore.
“Shqipëria duhet të zhvillojë instrumenta efektivë për të parandaluar mashtrimet në zgjedhje dhe blerjen e votave si dhe për të ndjekur në mënyrë të vendosur çdo moment dyshimi. Duhet të garantohet besimi i pakufizuar i qytetarëve në forcën e votës së tyre! Por kjo arrihet vetëm me një parlament funksional. Ne u bëjmë thirrje të gjitha partive, të punojnë në mënyrë konstruktive për reformën zgjedhore. Akuzat, të cilat kanë të bëjnë me mbarëvajtjen e zgjedhjeve të kaluara, duhet të verifikohen dhe përpunohen nga drejtësia dhe parlamenti në përputhje me procedurën e parashikuar për këtë.”/Opinion.al
