“Grua punëtore, dhe me plot vuajtje në jetë”, njihej nga fqinjët dhe të afërmit 58 vjeçarja Mimoza Paja që shfaqet në këtë foto dhe u vra aksidentalisht në Tiranë. Një nga mikeshat e saj tregon për klan nevvs se ajo, punonte dy turne për të mbajtur familjen.
“Bënte dy punë, edhe kamariere dhe banakiere. Të gjitha i bënte, punonte me dy turne dhe pse nuk kishte fuqi. Djalin e kishte papunë, vajzat në shtëpi të vet. Burri ka 3 vite që i ka vdekur. Ka qenë shumë e urtë.”
E mbetur jetime që 5 vjeçe, dhe nënë e tre vajzave dhe një djali, Mimoza para se të punonte banakiere dhe kameriere në lokalin ku u vra, kishte punuar në një market.
“Mimoza Paja, viktima e atentatit në Don Bosko, kishte 10 ditë që kishte nisur punën në këtë lokal dhe vetëm pak metra nga vendi ku punonte, ajo kishte banesën të cilën e mbante me qira.”
E gjithë skena e krimit, u pa nga mbesa 10-vjeçare e viktimës. Ajo qëndronte te vendi i punës së gjyshes thuajse çdo ditë, që pas divorcit të nënës. Një nga fqinjët tregon si e mori të miturën në shtëpinë e saj pasi u lëndua nga xhamat e bar kafesë.
“Ajo e shkreta ka dalë për një copë bukë që të mbante familjen. Ka dalë ka mbledhur dhe bidona, edhe punonte. Vajza 10 vjeçe erdhi te porta, e tha o teta Bardha më kanë vra, i pashë dy shenja si plumba, por ato i kishte nga xhamat. Po qante me të madhe, mu dhimbs dhe e mora.”
Për vrasjen e gruas në lokal reagoi djali i saj, i cili në një postim në rrjetet sociale shpreh zemërimin për ngjarjen e rëndë. Ai shkruan që mallkuar qofshin plumbat që u zbrazën në trupin e 58-vjeçares.
Indinjatë shprehën edhe banorët e zonës, të cilët thonë se ndjehen të pasigurt kur mësojnë për ngjarje të tilla.
“Grua e mirë ka qenë e shkreta, ça t’i bësh fati i saj. Ke frikë të dalësh në rrugë.”
“Unë mezi kam fjet gjumë mbrëmë.”
Atentati ku u ngatërrua shënjestra nga autorët ndodhi gjatë kohës kur në lokal kishte fluks klientësh./ Klan News
