Presidentja e Komisionit Europian, Ursula von der Leyen, ka paralajmëruar sot Shtetet e Bashkuara për një reagim të furishëm me kundërmasa shkatërruese nëse do të konsiderohen të nevojshme.
Teksa foli në Parlamentin Europian, ajo konfirmoi unitetin në veprim dhe theksoi për t’i zgjidhur problemet me dialog dhe jo tarifa.
Për javë të tëra, Trump ka promovuar 2 Prillin si “Ditën e Çlirimit” në Amerikë, kur do të zbulohen një sërë tarifash të majme për të zbatuar axhendën ekonomike radikale të administratës së tij. Shtetet e Bashkuara kanë njoftuar tashmë një rritje të mprehtë të tarifave për të gjitha importet e çelikut, aluminit dhe makinave.
“Evropa nuk e ka nisur këtë konfrontim”, tha Ursula von der Leyen.
“Ne nuk duam domosdoshmërisht të hakmerremi, por, nëse është e nevojshme, ne kemi një plan të fortë për t’u hakmarrë dhe ne do ta përdorim atë.”
Në fjalimin e saj, von der Leyen, presidente e Komisionit Evropian, tha se Evropa ishte “e hapur për negociata”.
“Ne do t’i qasemi këtyre negociatave nga një pozicion i fortë. Evropa ka shumë karta, nga tregtia te teknologjia e deri te madhësia e tregut tonë,” vazhdoi ajo.
“Por kjo forcë bazohet gjithashtu në gatishmërinë tonë për të marrë kundërmasa të forta nëse është e nevojshme. Të gjitha instrumentet janë në tryezë.”
Von der Leyen nuk dha detaje të mëtejshme se si BE-ja mund të hakmerrej./Opinion.al
