Udhëheqësit evropianë nominuan Lagarde javën e kaluar për të pasuar Mario Draghi si president i Bankës Qendrore Evropiane, duke ngritur pyetjen se kush do ta zëvendësonte atë në FMN.
Sipas Ministrit francez të Financave, Bruno Le Maire, ministrat e financave të vendeve të Europës duhet të gjejnë një kandidat për të zëvendësuar Lagarde
Le Maire tha se ministrat e financave europiane do të diskutonin këtë çështje në një takim në Bruksel të martën.
“Duhet të gjejmë një kompromis në nivel evropian … Unë shpresoj se do të gjejmë një kompromis për kandidatin më të mirë, kandidatin më të mirë europian për FMN,” u tha ai gazetarëve.
“Nëse kemi një kandidat të mirë evropian, ne mund të kemi një kandidat të mirë për FMN,” shtoi ai në përgjigje të një pyetjeje nëse guvernatori i Bankës së Anglisë, Mark Carney mund të ishte kandidat i Europës.
Megjithëse i lindur dhe rritur në Kanada, Carney, i cili është ish guvernator i Bankës së Kanadasë, mban pasaporta britanike dhe irlandeze përveç shtetësisë kanadeze.
Një zyrtar francez tha se Le Maire do të diskutonte këtë çështje me Presidentin Emmanuel Macron këtë fundjavë dhe se ai kishte të ngjarë të fliste me Carney më parë.
Tradicionalisht FMN, me qendër në Washington, është udhëhequr nga një evropian, ndërsa institucioni i saj simotër Banka Botërore është drejtuar nga një amerikan. Nganjëherë, vendet më të mëdha të tregut në zhvillim kanë kërkuar të prishin duopolin me kandidatët e tyre.
Duke pasur parasysh se presidenca e Bankës Botërore kohët e fundit shkoi tek amerikan David Malpass, zyrtari francez tha se nuk kishte asnjë arsye pse FMN nuk duhet të shkonte përsëri te një europian.
Europianët e tjerë që po konsiderohen në Paris për punën e FMN-së përfshijnë Komisionerin e Konkurrencës të BE Margrethe Vestager dhe ish ministrin e financave holandeze Jeroen Dijsselbloem. /Opinion.al
