Talibanët kanë kryer atë që mendohet të jetë ekzekutimi i tyre i parë publik që nga kthimi i tyre në pushtet në Afganistan vitin e kaluar.
Një zëdhënës i qeverisë së talibanëve tha se një burrë u vra në një stadium të mbushur me njerëz në provincën jugperëndimore Farah, pasi ai rrëfeu për vrasjen.
Sipas zëdhënësit të tyre Zabihullah Mujahid, ekzekutimi u ndoq nga disa gjyqtarë të Gjykatës së Lartë, personel ushtarak dhe ministra të lartë duke përfshirë ministrat e drejtësisë, të jashtëm dhe të brendshëm.
Para ekzekutimit është lëshuar një njoftim publik ku publikohet ngjarja dhe “kërkohet nga të gjithë qytetarët të na bashkohen në fushën e sportit”.
Ndërkohë, sipas talebanëve, i ekzekutuari i quajtur Tajmir, djali i Ghulam Sarwar dhe banor i provincës Herat, kishte goditur me thikë një burrë të quajtur Mustafa rreth pesë vjet më parë.
Nëna e viktimës i tha BBC-së se liderët talebanë i ishin lutur që ta falte burrin, por ajo kishte këmbëngulur për ekzekutimin e tij.
“Talibanët erdhën tek unë dhe më lutën që ta fal këtë të pafe. Ata insistojnë që ta fal këtë njeri për hir të Zotit, por unë u thashë se ky njeri duhet të ekzekutohet dhe të varroset njësoj siç bëri me djalin tim. Ky mund të jetë një mësim për njerëzit e tjerë. Nëse nuk e ekzekutoni, ai do të kryejë krime të tjera në të ardhmen”, tha nëna e viktimës.
Aktualisht, asnjë vend nuk e ka njohur qeverinë e tyre të re dhe Banka Botërore ka mbajtur rreth 600 milion dollarë, pasi talebanët ndaluan vajzat të kthehen në shkollat e mesme. SHBA ka ngrirë gjithashtu miliarda dollarë të mbajtura nga banka qendrore e Afganistanit në llogaritë në mbarë botën./Opinion.al
